Energia berriztagarriek izandako “boom”-ak erdieroaleen fabrikatzaile asko bultzatu ditu hardwareaz aldatzera. Hainbat enpresa silizioa erabiltzen hasi dira txip informatikoen ordez eguzki panelak muntatzeko. Gogoratu behar da panel horiek ere silizioz eginda daudela.

Internet Advertisin Bureau (IAB) antolakundeak mundu osoko publizitateko eta on-lineko edukien enpresak biltzen ditu eta hainbat gomendio ezarri ditu Interneteko bideo bidezko iragarkiak arautzeko. Ekimena oso garrantzitsua da, izan ere, gogoratu behar da banner tradizionalen kopurua handitu egin zela IAB-ak formatu estandar batzuk ezarri zituenean.

Ingeteam Bizkaiko enpresak 17 milioi euro inbertituko ditu Zamudio eta Beasaingo elektronikako bi teknologi zentro horietan eta bertan erabiliko diren potentzia handiko makina elektrikoetan. Bi laborategi hauek (honelako lau baino ez daude munduan) 200 ikertzaile enplegatuko dituzte, zeinak bertan landutako aplikazioak ebaluatuko dituzten energi, trenbide eta ontzigintzaren sektoreetan, baita sektore siderurgikoan ere.

iNNoVaNDiS Deustuko Unibertsitateko ekimenak eta Donostiako Sustapena udal erakundeak iWeekend bat antolatu dute maiatzaren 23 eta 25ean. Asteburu horretan ekintzaileak elkarrekin bilduko dira negozio ideia bat hautatu eta ideia hori enpresa bilakatzeko xedez.

Bilboko Ingeniaritza Eskolak energia berriztagarriak ikertzeko eta horiekin lotuta dauden proiektuak garatzeko ikasgela bat sortu du bost enpresa eta zentro teknologikorekin batera. Zehatzago esanda, Gamesa, Ingeteam, Tecnalia, Tekniker eta Cener-Ciemat enpresek ikasleen ekimenak berrikusiko dituzte.

Robert Nietok eta Gregorio Carrascok, Deustuko ESTEko 3. eta 5. mailako ikasleek, irabazi dute 2008ko ekintzaile lehiaketaren lehen saria. Enpresa kudeaketa sustatzen duen lehiaketa hau Ekonomialarien Euskal Elkargoak eta Aiesec-ek antolatu dute Spriren laguntzarekin. Robert Nietok “erabaki onena” kategoriako saria jaso du eta Gregorio Carrascok “berrikuntza” kategoriakoa.

Second Life hiltzeko zorian den honetan, publizitateko inbertsioak erakarriko dituzten mundu birtualen alternatiba berriak agertzen hasi dira. Orain arte Google Earth zen aukerarik onena, baina Microsoft-ek aurkeztu duen alternatiba, Virtual Earth alegia, Google-ena baino indartsuagoa da.

Industrias Imar enpresak ia 80 urte ditu eta hasieran meategientzako xafla zulatuak fabrikatzen bazituen ere, egun aditua da eraikuntzarako soluzioetan. Bere produktuekin eraikitako obren artean, azpimarratzekoa da Madrileko Caixa Forum eraikin modernoa.

Irudi eta bideoen bilaketan oinarrituko dira Google-k datozen urteetan egingo dituen garapen garrantzitsuenak. Estatu Batuetako enpresak informazio hori baieztatu zuen WWW-aren 17. Konferentzian. Bertan, Google-k argazkiak beren edukiaren arabera sailkatzeko modua ikertzen ari den 150 ikertzailez osatutako taldea aurkeztu zuen.

Ingema Fundazioak, Matia Fundazioaren Ikerketa Institutuak, Europako proiektu garrantzitsu batean parte hartzen dihardu, Europako Batasuneko zenbait erakunderekin eta unibertsitaterekin elkarlanean: IWARD proiektua (laguntzarako, azterketarako, garbiketarako eta banaketarako robot adimendunen sarea). IWARD proiektuaren helburua da erreminta teknologiko berritzaile bat garatzea, laguntza-zerbitzuetan konponbide aurreratuak eskaintzeko.

2007ko deialdian Dynakin eta zylk.net enpresak saritu dituzte oinarri teknologiko onenaren eta enpresa berritzaile onenaren kategorietan, hurrenez hurren. Deialdi honetan 2003 eta 2006 bitartean sortutako enpresek parte hartu dute eta saria 6.000 eurokoa izan da modalitate bakoitzean.

Espainiako Zientzia eta Teknologiako Fundazioak I+G+b 2004-2007 Plan Nazionalaren garapenari buruzko txosten bat prestatu du eta euskal enpresen partaidetza azpimarratu du bertan. 654 ikertzailek betetako beste horrenbeste galdetegiren erantzunak aztertu zituzten. Galdetegi horien emaitzak kontuan hartuta ondorioztatu da EAEn egoitza duten enpresek lortu dituztela ekimen honek (Profit izenez ere ezaguna) diruz laguntzen dituen proiektu gehienak.